२४ वर्षपछि नकआउटमा अमेरिकाको ऐतिहासिक जित, बोस्नियालाई २–० ले हराउँदै अन्तिम १६ मा प्रवेश

सुनौलो नेपाल

बिहिवार , आषाढ १८, २०८३

२४ वर्षपछि नकआउटमा अमेरिकाको ऐतिहासिक जित, बोस्नियालाई २–० ले हराउँदै अन्तिम १६ मा प्रवेश

काठमाडौं ।सहआयोजक अमेरिका फिफा विश्वकप २०२६ को अन्तिम १६ (नकआउट चरण) मा प्रवेश गरेको छ । बिहीबार सान फ्रान्सिस्को बे एरिया स्टेडियममा सम्पन्न रोमाञ्चक खेलमा बोस्निया एन्ड हर्जगोभिनालाई २–० गोल अन्तरले पराजित गर्दै अमेरिकाले अघिल्लो चरणको यात्रा तय गरेको हो ।

यो जितसँगै अमेरिकाले विश्वकप इतिहासमा २४ वर्ष लामो नकआउट जितको खडेरी समेत तोडेको छ । यसअघि सन् २००२ को विश्वकपमा मेक्सिकोलाई हराएर क्वार्टरफाइनल पुगेयता अमेरिकाले दोस्रो चरणको खेल जित्न सकेको थिएन ।

खेलको सुरुवातदेखि नै आक्रामक खेलेको अमेरिकाका लागि पहिलो हाफको इन्जुरी समयमा फोलारिन बालोगुनले गोल गर्दै सुरुवाती अग्रता दिलाएका थिए । तर, खेलको ६४औं मिनेटमा उनै बालोगुन रातो कार्ड खाँदै मैदानबाट बाहिरिएपछि अमेरिका दबाबमा आयो र १० खेलाडीमा सीमित हुन पुग्यो ।

एक खेलाडी कम भए पनि अमेरिकाले रक्षापंक्ति र खेलमा आफ्नो नियन्त्रण गुमाएन । खेलको ८२औं मिनेटमा मलिक टिलम्यानले डिबक्सबाहिरबाट प्रहार गरेको आकर्षक फ्रिकिक सिधै गोलमा परिणत भएपछि अमेरिकाले २–० को जित पक्का गर्‍यो ।

अमेरिकाको यो जितसँगै विश्वकप २०२६ का तीनै आयोजक राष्ट्रहरू नकआउट चरणमा पुग्न सफल भएका छन् । मेक्सिको र क्यानडाले यसअघि नै अन्तिम १६ मा आफ्नो स्थान सुरक्षित गरिसकेका छन् ।