विश्वकप २०२६ : आइभरी कोस्टमाथि जर्मनीको रोमाञ्चक जित, एक खेल अगावै नकआउट चरणमा

सुनौलो नेपाल

आइतवार , आषाढ ७, २०८३

विश्वकप २०२६ : आइभरी कोस्टमाथि जर्मनीको रोमाञ्चक जित, एक खेल अगावै नकआउट चरणमा

काठमाडौं । फिफा विश्वकप २०२६ अन्तर्गत समूह ई को रोमाञ्चक खेलमा जर्मनीले आइभरी कोस्टलाई २–१ गोल अन्तरले पराजित गर्दै नकआउट चरणमा आफ्नो स्थान सुरक्षित गरेको छ । क्यानडाको टोरन्टोमा आइतबार बिहान सम्पन्न खेलमा वैकल्पिक खेलाडी (सुपर सब) डेनिस उन्डाभ नायक बनेपछि जर्मनीले उत्कृष्ट पुनरागमन जित निकालेको हो ।

यो जितसँगै समूह ई मा लगातार दोस्रो जित दर्ता गर्दै ६ अङ्कका साथ जर्मनी एक खेल बाँकी छँदै अन्तिम १६ मा प्रवेश गरेको छ । सन् २०१४ मा विश्वकप उपाधि जितेयता जर्मनी पहिलो पटक विश्वकपको नकआउट चरणमा पुग्न सफल भएको हो ।

खेलको सुरुवाती नियन्त्रण जर्मनीले राखे पनि पहिलो गोल भने आइभरी कोस्टले गरेको थियो । खेलको ३०औँ मिनेटमा कप्तान फ्रान्क केसीले गोल गर्दै आइभरी कोस्टलाई सुरुवाती अग्रता दिलाएका थिए । पहिलो हाफमा १–० ले पछि परेको जर्मनीका लागि प्रशिक्षकले दोस्रो हाफमा रणनीति परिवर्तन गरे ।

खेलको ६०औँ मिनेटमा मैदान प्रवेश गरेका डेनिस उन्डाभले जर्मनीको संकट टारे । उनले मैदान छिरेको आठ मिनेटमै (६८औँ मिनेटमा) नादिएम अमिरीको पासलाई सदुपयोग गर्दै खेललाई १–१ को बराबरीमा ल्याए ।

बराबरीतर्फ धकेलिरहेको खेलको इन्जुरी समयको चौथो मिनेट (९४औँ मिनेट) मा उन्डाभले पुनः जादुमयी प्रदर्शन गरे । फेलिक्स एनमेचाको पासमा उन्डाभले व्यक्तिगत दोस्रो तथा टोलीका लागि निर्णायक गोल गर्दै जर्मनीको जित निश्चित गरे । जारी विश्वकपमा सुपर सबु को भूमिकामा चम्किरहेका उन्डाभको यो व्यक्तिगत तेस्रो गोल हो ।

खेल अवधिभर जर्मनीले ५९ प्रतिशत बल पोसेसन राख्दै आइभरी कोस्टमाथि लगातार दबाब सिर्जना गरेको थियो । जर्मनीले विपक्षीको पोस्टमा १६ पटक प्रहार गरेकोमा ७ सट लक्ष्यमा थिए । अर्कोतर्फ, आइभरी कोस्टले खेलभर मात्र दुईवटा सट लक्ष्यमा राख्न सक्यो ।

पराजयका बाबजुद आइभरी कोस्ट २ खेलबाट ३ अङ्क जोड्दै समूहको दोस्रो स्थानमा कायमै छ । अब समूह चरणको अन्तिम खेलमा जर्मनीले इक्वेडरको सामना गर्नेछ भने आइभरी कोस्टले कुरासाओसँग प्रतिस्पर्धा गर्नेछ ।