सहआयोजक अमेरिकामाथि बेल्जियमको शानदार जितः सेमिफाइनलका लागि स्पेनसँग भिड्ने

सुनौलो नेपाल

मंगलवार , आषाढ २३, २०८३

सहआयोजक अमेरिकामाथि बेल्जियमको शानदार जितः सेमिफाइनलका लागि स्पेनसँग भिड्ने

काठमाडौं । सहआयोजक अमेरिकालाई ४–१ को फराकिलो गोल अन्तरले पराजित गर्दै बेल्जियम फिफा विश्वकप २०२६ को क्वार्टरफाइनलमा प्रवेश गरेको छ । अमेरिकाको सियाटल स्टेडियममा मंगलबार बिहान सम्पन्न राउन्ड अफ १६ को एकपक्षीय खेलमा बेल्जियमले उत्कृष्ट प्रदर्शन गर्दै घरेलु टोलीलाई प्रतियोगिताबाट बाहिर पठाएको हो ।

बेल्जियमलाई शानदार जित दिलाउने क्रममा चार्ल्स डे केटलेरले दुई गोल गरे भने हान्स भानकेन र रोमेलु लुकाकुले एक–एक गोलको योगदान दिए। अमेरिकाका तर्फबाट मलिक टिलम्यानले सान्त्वना गोल फर्काए ।

खेलको नवौँ मिनेटमै डे केटलेरले गोल गर्दै बेल्जियमलाई सुरुआती अग्रता दिलाएका थिए। तर, ३१औँ मिनेटमा अमेरिकाका टिलम्यानले आकर्षक फ्रिकिकमार्फत गोल गर्दै खेललाई १–१ को रोमान्चक बराबरीमा ल्याए। अमेरिकाको त्यो खुसी लामो समय टिक्न सकेन । त्यसको दुई मिनेटपछि नै (३३औँ मिनेटमा) डे केटलेरले व्यक्तिगत दोस्रो गोल गर्दै बेल्जियमलाई पुनः २–१ को अग्रता दिलाए ।

दोस्रो हाफमा थप आक्रामक बनेको बेल्जियमका लागि ५७औँ मिनेटमा भानकेनले गोल थपेपछि खेल पूर्ण रूपमा बेल्जियमको नियन्त्रणमा आयो। खेलको इन्जुरी समयको अन्त्यतिर भेट्रान स्ट्राइकर रोमेलु लुकाकुले गोल गर्दै बेल्जियमको ४–१ को सहज एवं शानदार जित सुनिश्चित गरे ।

यो जितसँगै बेल्जियम आठ वर्षपछि विश्वकपको क्वार्टरफाइनलमा पुग्न सफल भएको छ। सन् २०१८ को विश्वकपमा तेस्रो स्थान हासिल गरेको बेल्जियम गत २०२२ को कतार विश्वकपमा भने समूह चरणबाटै बाहिरिएको थियो । अब बेल्जियमले सेमिफाइनल प्रवेशका लागि पोर्चुगललाई हराएर क्वार्टरफाइनल पुगेको बलियो टोली स्पेनको सामना गर्नेछ ।

यता, घरेलु मैदान र हजारौँ समर्थकको बलियो साथ पाएको अमेरिका भने २४ वर्षपछि विश्वकपको क्वार्टरफाइनल पुग्ने ऐतिहासिक अवसरबाट चुकेको छ। यस हारसँगै अमेरिकाको विश्वकप यात्रा घरेलु मैदानमै अन्तिम १६ मा टुंगिएको छ ।